ناس كتير بتتعامل مع الانتخابات بمنطق مبارك بتاع (هو أنا لسة حفر فى كل حاجة ؟ يا راجل كبر مخك ...)
الانتخابات دى اكبر مؤشر على اهتمامك بالشأن العام ببلدك و اهل بلدك ...فاكر ان لو انت مش فارق معاك صوتك ممكن يفرق انك تجيب رئيس يخدم واحد غلبان مش لاقى ياكل ولا مريض مش لاقى علاج فكر فى الناس دى مش فى نفسك بس ..متكونش بدون قصد بتخلق واقع انهزامى ...احلم بالتغيير
متكبرش مخك.. ماتستسهلش ..فر فى كل واحد ..متخترش بالأحلى ولا الأشيك ولا اللى عنده حسنة تحت عينه الشمال و الجو دة أبوس ايدك ...ركز كويس ..صوتك أمانة ربنا حيسألك عليها لازم تعرف انت بتختار دة ليه و عشان ايه ؟ تقرأ البرنامج بتاعه تشوف ماضيه مواقفه وقف معانا أيام ماكنا بناخد بالجزم ولا كان مطنش ؟ قادر يدير بلد ولا محتاج اللى يساعده ؟ يقدر يوحد طوائف الشعب وراه بعد موجة الاقصاء و الكره اللى حصلتلنا ؟..اعرف الراجل دة حيعمل ايه فى الصحة فى التعليم فى السياسة الداخلية و الخارجية زراعة صناعة سياحة ...الى اخره .
اسأل نفسك المرشح دة ممكن أختاره ليه غير برنامجه ؟
ماتدورش على استقرار زائف و افتكر نعم الاستقرار وديتنا لفين ولا شفنا استقرار ولا بتنجان مقلى وفكر كدة هل مرشح من الفلول ممكن فعلا يحقق استقرار ولا حيخلق دايما حالة من الغليان فى الشارع ؟
وليه أصلا ترشح فلول؟ شخص من النظام مش ممكن ينفصل عنه محكوم بطبيعة لا تؤمن بالتغيير الجذرى .
شوف مين أيام مبارك اتكلم و دافع عننا و كان جزاءه السجن و التشويه و الأذى و مين عمل من بنها حفاظا على منصبه اللى كان يقدر منه انه يعترض. بدون ذكر أسماء شفيق و موسى..مين تاريخه نضيف و مين تاريخه مشبوه ؟؟؟ بدون ذكر أسماء شفيق .
..ليه نجيب حد عقله متكلس بأسلوب عتيق من نظام فاشل نهبنا و سرقنا و امرضنا ؟ فاكر ان طريقة تفكيرهم حتختلف ؟ اذا كان واحد قايل مبارك مثلى الأعلى و صديقى بدون ذكر أسماء شفيق ..... و التانى بيقول أنا معجب بسياسة مبارك و حرشحه . بدون ذكر أسماء موسى .هاااار أسوووود .واضح طبعا جمال سياسة مبارك .
مين الطبقة العليا اياها بتأيده بكل قوة و ليه ؟ للدرجة خروج أتوبيسات كاملة لتأييده ...أكيد مش حبا فى البلد اللى هم ناهبينها أكيد مش حيكون غير حفاظا على مصالحهم ..انت فاكر انك لما بتجيب فل بييجى بطوله ؟ دة وراه ألعن شبكة مصالح و ناس منتفعة و صفقات مشبوهة .
مين اللى قال انه لو خسر الانتخابات حيسلت ايده من البلد و مالوش دعوة... بدون ذكر أسماء موسى و شفيق ... و مين اللى قال انه حيخدمها من أى مكان ؟؟
مين كان فى منصب يسمح له بالمحاولات الكتيرة لحل المشاكل و ماستغلش الفرصة و ليه ماستغلش الفرصة ؟ ماهو يا جبن يا هو كمان فاسد و فى الحالتين لا يصلح ...مين قال الحق فى وجه سلطان جائر ؟ كان مع الثورة من قبل أن نتصور أن هناك ثورة، دفع حريته و امنه ثمن لمواقفه السياسية، لم يرضى بأن يكون فى فريق حسنى مبارك فينعم بخيرنا وإنما تحيَّز للشعب .
مين مؤتمراته بتتأمن بالبوليس اللى عامل مقموص ؟ وليه ؟ و بلطجية المرشح نفسه ... بدون ذكر أسماء شفيق .
مين خرق الصمت الانتخابى بمنتهى الفجاجة باعلان فى جريدة رسمية و كاتب فيه لا أحد فوق القانون طب ازاى وانت أول واحد خرقت القانون ؟ بدون ذكر أسماء شفيق و يقول حرجع الأمن فى 24 ساعة ؟ ممممممم ...طلعت انت اللى مسرحهم يعنى و سايبهم ليه علينا سنة و نص يا راجل ؟
مين متقدم فيه بلاغات وصلت لأربعين بلاغ عند النائب العام و لم يتم التحقيق فيهم و ليه ؟ بدون ذكر أسماء شفيق .
مين الشعب قاله ارحل وهو رئيس وزراء و بكل بجاحة بيترشح للرئاسة ؟ مين بيستقبلوه فى مؤتمراتهم بالجزم بدون ذكر أسماء شفيق . و أحيانا منع لدخول المؤتمر بدون ذكر أسماء موسى و مين بيقابل بكل احترام .
مين اللى من قبل ما ياخد أى منصب بيهددنا و بالجيش بتاعنا ؟ بدون ذكر أسماء شفيق ياعينك يا أخى و مين قالك أصلا اننا لسة بنخاف ؟ مين اللى بتتباس ايده من دلوقتى و هو سعيد قوى ؟ بدون ذكر أسماء موسى .
أما بقى لو شايف ان فى حد معين حيحققلك الأمن و الأمان والاستقرار بدعوى انه قوى و حازم فدة مش حيتحقق غير مع رضا الشارع لأن الشعب طبيعة الاستكانة و الخنوع فيه اتغيروا ...((احذروا من قلوب رأت الموت ))
لو شايف انك بتعند مع (بتوع التحرير) زى مابتسميهم يبقى تقعد فى بيتك أحسن و تفتكر ان لولا بتوع التحرير ماكنتش حتشوف الصندوق دة ولا فى أحلامك .
الشهدا ماتوا و هم بيحلموا بالتغيير جابوهولك بدمهم و المصابين اللى فقدوا عيونهم و و أرجلهم و مصدر رزقهم كل دة عشان حلموا بالبلد أحلى ماتخذلهمش ....مش معقول بعد كل دة نرجع النظام السابق بكل قبحه و بكل سهولة ولا كأن فى أرواح راحت ...مش ممكن نرجع واحد ايده فيها دم أكتر من 135 شهيد بدون ذكر أسماء شفيق . أو واحد كان بيروح الميدان عشان يقنع الناس تمشى و يصبروا على مبارك ست شهور كمان ...واحد كان مقتنع بسياسة مبارك .. ؟ بدون ذكر أسماء موسى .
كان هذا هو الموجز والآن اليكم أهم الأنباء ..
انت مش لوحدك فى البلد ماتخليش عندك أو خوفك يغلبك فكر فينا كلنا .
متصوتش لحد ساهم فى افساد الحياة السياسية ...متصوتش لحد ليه نفس سياسة مبارك ....متصوتش للى سكت و اتفرج علينا تلاتين سنة......متصوتش للفلول ...اختار مرشح ثورى يحقق أحلامنا ...احلم بالتغيير . لقد ورمنا .
