عشان من حقى أتكلم

عزيزى الجيش ...أرجوك متقتلنيش ..متكهربنيش ..متخطفنيش...متاكولنيييييش

أنا ولا ناشطة ولا ماشطة ولا أى حاجة انا واحدة عادية ولا مسيسة ولا مؤدلجة لسة سنة أولى سياسة و ده طبعا بفضل الثورة عشان قبلها طبعا كانت يا بيه السياسة دى حرام و عيب و بتهز عرش السموات و الأرض  ..أبسط حق من حقوقى انى اتكلم ...انى انتقد انى احاسب اللى يحكمنى و ده الحق اللى انت عايز تحرمنى منه ....يعنى هو انا قبل الثورة أخاف من امن الدولة يطلعلى بعدها بعبع السجن الحربى ؟

مش بكتب عشان أقعد أشتم فيك و خلاص مش دى قضيتى ...قضيتى انى أشارك فى حملة لكسر هيبة الحاكم...اوقع تابو الحاكم ..بكتب عشان أثبت لنفسى ان مفيش خطوط حمرا فى مصر غير مصلحة الشعب و حريته و اننا مش حنخاف تانى و مش حيحكمنا الهة تانى من الأخر.... طبعا انا مش بتكلم على الناس هواة جمع الأصنام اللى عايشين على لحس جزم الحكام  و المجلس زى ابوك دول ربنا يتولاهم بقى .

محدش بعد ثورة زى دى حيقولنا تانى نقول ايه و منقولش ايه ..امتى نتظاهر ولا بلاش أصلا

أنا مش خايفة من العسكر انا أصلا محتاجة اثبت حبى لمصر فعليا و دم دم بقى انا اصلا زعلانة عشان مفياش خدش حتى من اللى حصل فى حد فى التحريرو عندى عقد نفسية من الموضوع ده وبتعالج ..

مش عايزة استعدى المجلس أو أقول مجلس رئاسى لأنى أصلا مش مقتنعة بيه فى ظل الأوضاع اللى احنا فيها ..فى فرق بين كراهية الجيش و انتقاده و بين احترامه و تأليهه و الجيش مادام رضى انه يبقى مسئول عن مصر الفترة دى يبقى يتحمل الانتقاد و واجب علينا كمان نقده ....وااااااجب ....انطق ابوس ايدك.

بكتب عشان الاعلام كله بقى موجه لتأليه الجيش و التعتيم على انتهاكاته و خصوصا بعد القانون الرائع بتاع محدش يتكلم عن الجيش الا باذن من المجلس الله ع الثورة اللى قامت عشان نرجع حريتنا و كرامتنا ...قال و كنا زعلانين عشان قمع الحريات فى عهد مبارك ...

و الأحلى التحقيق مع بثينة كامل بتهمة سب الذات العتمانية ...بتفكرنى بتهمة كدة كانت حصرى فمصر اسمها اهانة رموز الدولة.

مبدئيا مكانش عندى مشكلة مع الجيش و فرحت بنزولهم الشارع يوم 28 و هييييه بقى و مش حخبى عليكم بموت فى الدبابات زى أى عيل بيحترم نفسه و بدلدل من الشباك اول ماسمعها جاية لحد ماببقى حقع على بوزى ...طبعا كان ليك يا جيش حركات قرعة زى انك كنت بتودى الذخيرة للبوليس يموتوا بيها اخواتنا و يوم موقعة الجمل لما عملت أهبل ومات 135 واحد و الاف اتصابوا وفى فقدوا عنيهم بس ياااالللااا مش حجيب سيرتهم و عفا الله عما سلف عشان انت شكلك ابن حلال ..

لحد مامسكت الحكم دان دان داااان

طبعا بدأتها بتحية الشهداء فى لقطة ابكتنا كلنا و معملتش كدة حتى مع المخلوع و بعدها بقينا صحاب بقى و فيس بوك و مسجات و ايه الدلع و الغرام ده كله ؟ ..اسلوب الطبطبة بدأ الانحياز للشعب و توجيه الخطاب الاعلامى للبوس فى الثورة و الثوار مع التعهد الكامل بحماية الثورة و العمل على تحقيق مطالبها كل دة جميل فين البروبلم ؟ ايه اللى حصل ؟ فجأة الحب اتقلب شك ..أسئلة ...تباطؤ ماشى ...تطنيش ميضرش....فض اعتصامات ...شيت...تعذيب فى المتحف...حقه كلو الا كدة ....ضرب نار و واحد يموت ..احييييييييييييييييييييييييييييه

وفجأة و بقدرة قادر القلة المندسة فعهد مبارك بقت العناصر المشبوهة ...و الماس الكهربى و المختل عقليا بقت أم ضادة و قوى الشر و الظلام والفلول .

هو انت قلت قوى الشر والظلام فعلا ؟

مبدئيا عايزة أشكرك عشان مسمعتش كلام المخلوع و فتحت ع الشعب النار و و قفت مع الشعب و انحزت للشعب و الكلام دة ...و لو انى مش شايفة بقى فعليا اى اعجاز فى اللى حصل عمليا الجيش بيحمى الشعب و مش شايفة غير انك عملت واجبك و شكرا يا سيدى عليه ...يعنى مينفعش يطلع شاهين يقول بوسوا ايديكوا شعر و دقن اننا معملناش زى ليبيا ..مع احترامى بس ده مش تفضل منك ..انت اصلا لو معملتش كدة المفروض نقدم فيكو بلاغ بالخيانة العظمى ..و بعدين انتو بتعوضوا ده يعنى فى الاعتقالات و التعذيب و منعتوا التظاهر ...خالصين بقى ؟

زى ماهو مينفعش نسأل عتمان عن مين قتل على ماهر و الدماء اللى سالت فى التحرير يوم 9 ابريل يلقى علينا اخر مقطوعة شعرية ألفها و لا نسأله ازاى مدون يتحبس عشان قال رأيه فى الجيش ...يعملنا فقرة اوتار الليل و ينشف دموعه و يقولنا الجيش بيحب الشعب من طرف واحد و الشعب مش حاسس بيه ...

ولا بقى الشاب الوسيم اللى قال الاستفتاء ابو 200 مليون ده اللى طلعوا اترموا فى الزبالة و مالوش لازمة اصلا ..قال ايييييه كان على بقاء المجاس العسكرى و قال ايه الناس قالت نعم للمجلس العسكرى ورحمة النعمة مشفت السؤال ده فى ورقة الاجابة .

أتارى يا اخى الاستفتاء ده كان عجيب قوى كل واحد فاكره على حاجة ناس قالوا نعم للمادة التانية و ناس قالوا نعم للاستقرار انما اصلا بقى هو طلع ع الجيش .

.

طبعا انا مش حتكلم عن المجلس اللى كله من النظام ولا حقول الكلام الفارغ بتاع كانوا فين لما حصل و حصل و ال30 سنة اللى فاتوا كانوا فين و مبارك هو اللى جابهم و الفساد و الأسرى المصريين اللى ماتوا و الملفات القديمة و الكلام الفارغ اللى اتقال ساعتها و كله عمل أهبل و مش سامعه عشان الأمور تمشى و البلد –لا مؤاخذة- تستكر.. احنا اتفقنا انى مش بتاعة مشاكل انا ليا من اول مابقيت حاكم مصر شفنا من جنابك ايه ؟؟؟؟؟

طبعا الكلام كتير و مش حيخلص و الانتهاكات كلها موجودة للى عايز يعرفها و حتلاقوها فى كذا مدونة تانية عملها ناس جامدة عنى و بالأرقام و حاجة زى الفل  ...اوستيك يعنى

خلاصة القول يا سيادة المجلس العسكرى و ربنا يجعل كلامنا خفيف عليك احنا مصدقنا نشم نفسنا مصدقنا نعمل حاجة عدلة بايدنا بدل فيلم البكاء على الأطلال و بطولاتنا اللى راحت الشعب بقاله اكتر من تلاتين سنة مكبوت و حالته كرب ليه عايزين ترجعونا تانى لقبل الثورة ؟  هو احنا غلطنا لما طالبنا بحريتنا و كرامتنا ؟ وليه شوية مطالب كدة بعد اذنك

وحياة أبوك كفاية بلالين اختبار لقد ورمنا...ورمناااا...... احنا ولا حنعفو ولا حنصالح و خلى شوزى تولع بال 24 مليون بتوعها دول ده انا لو بعت املاكى حيجيبوا أكتر من كدة ..احنا مش شعب شحات و دى مش ثورة جياع ..احنا شعب كرامتنا ناقحة علينا و بيننا و بينهم دم محدش حيسامح فيه ...لو ناوى على غدر قول و ريحنا واحنا بقى نتصرف و ياكش تولع ماهى خربانة خربانة ..كفاية ارهاب اعلامى و تخويف من السلفيين اللى كلوا ودان الناس و داخلين على مناطق تانية و الافلاس و عجلة الانتاج فست  و بعدين عيب بقى اما تعمل عقلك بعقل عجلة....

وحبذا بلاش احنا مع الثورة من اول يوم و كنا مستنظرينها ...اومال سبتوا الناس تموت ليه ؟ بلاش تستهبلونا يعنى مش للدرجة دى و ابعدوا عن الأهرام ده عشا اتضح ان اخرته وحشة

و بطلوا شعار البلطجية و الجيش ايد واحدة على الثوار ده ...اه و مش عايزين نعرف أخبار عن مبارك و النبى عشان مستفزة بجد احنا مال اهلنا بيعيط ولا مكتئب و صابغ شعره ولا لأ ؟ اول بس مايوصل طرة بلغونا ..أو لو مش ناويين بلغونا برضه

كفاية و النبى الحتة بتاعة الشعراوى بتاعة الثائر الحق دى خلاص حفظناها ...تحب اسمعها ؟ والله مافى فايدة ده احنا شعب غتت ...و فى واحد مع عمرو اديب كان بيقولنا انتوا مفيش حاجة عجباكوا ابدا ؟ احنا أصلا مشفناش حاجة و بعدين من حقنا نطالب بأى حاجة هى مش بلدنا ؟  و ياريت كفاية كسب غير مشروع كدة و نخش فى التقيل فى خيانة عظمى فى فساد سياسى فى ناس قتلت الثوار و متحاكمتش و ناس عذبت الشعب و عايشين حياة لوز مش دول أولى بالمحاكمات العسكرية ؟ من العيال اللى بتلموهم من غير ذنب و يتلبوا أحكام عسكرية بين يوم و ليلة ...

يا سيادة المجلس العسكرى انت عندك فرصة اسمك يتكتب بحروف من نور فى التاريخ متضيعهاش ..خليكوا مع الشعب و مطالبه ..لازم تعرفوا ان الشعب مش حيسيب مطالبه و انه معادش يخاف تانى ..الشعب راحت منه الروح و خفة الدم اللى كانت فى الثورة و بدأ يكتئب تانى عشان حس انه بياخد على قفاه و دى اكتر حاجة بتوجع المصرى أكتر حتى من الجوع ...متسرقش حلمنا انت ايه معندكش ثوار بنات ؟

خليكوا مع الشعب عشان زعله وحش ولو قال طور روحوا احلبوه ..

عشان بنحبك بننقدك و بنقلك كفاية كدة سواء متواطىء متباطىء مش عارف تتعامل مرتبك كل ده ملوش الا نتيجة واحدة ...زفت على دماغنا و اتصرف يا تمشى يا تتعدل ياتوفرولنا الكولة .

عزيزى اللى قريت : معلش أول تدوينة بقى و كل سنة و انت طيب و ميبقاش قلبك أسود بقى...

عزيزى الجيش ....اول مرة اكتب تدوينة فحياتى مكسوفة من نفسى قوى انى أول ماكتب أكتب عشان أنتقدك و أقل ادبى عليك ...وانى لم اكن انتوى و بيحز فنفسى ...حتى عيب يعنى ..يلا معلش مانت برضه عمايلك تخنق ..ده انا عملتلك المدونة مخصوص عشان كدة  يا أخى ....انا بشكر الجيش اللى خلانى أعمل المدونة أخيرا ...وبشكر تونس..و بشكر الجزيرة...مفيش خوف تااانى مفيش ذل تاااانى